Agassac er fallegt lítið Chateau eða vínhús á Haut-Médoc svæðinu í Bordeaux, flokkað sem Cru Bourgeois en þau vín eru oft með bestu kaupunum. Þau eru stór og mikil en ekki eins stór og mikil þegar kemur að verði og vín frá mörgum öðrum svæðum Médoc. Eigandinn Jean-Luc Zell hefur lagt mikinn metnað í að þróa Agassac áfram á síðasta áratug og það er svo sannarlega að skila sér í stöðugt betra víni – sem var þó gott fyrir.

Þroskaður dökkur ávöxtur, sólber, trönuber, kirsuber, reykur og eik. Vel uppbyggt, þétt og þægileg tannín, við bætist bragð af pipar, kamfóru, myntu, súkkulaði og nýmöluðu dökkristuðu kaffi. Mælt með umhellingu.